TAMUXE FOI HOMENAXEADO POLO CONCELLO DO ROSAL NA XXVIII FESTA DO CABAQUEIRO

Condecorado publicamente coa insignia do Concello e cun "Castelao" en recoñecemento "pola súa labor história e de investigación da cultura rosaleira"

EXPOSICIÓN DO XACEMENTO ARQUEOLÓXICO DOS MEDOS (CURRÁS, CONCELLO DE TOMIÑO)

Na imaxe, Tamuxe e Juan Ramón M. Barbosa diante do panel que informa do descubrimento de 1972 realizado polo Equipo Arqueolóxico do Baixo Miño

PRESENTACIÓN DO TERCEIRO NÚMERO DE CASTELLUM TYDE NA ÁREA PANORÁMICA DE TUI

Na imaxe, Xoán M. Tamuxe na compaña do alcalde de Tui, Moisés Rodríguez e os historiadores, membros do Instituto, Xavier Añoveros e Marta Cendón

XOÁN MARTÍNEZ TAMUXE FOI O PREGOEIRO DA VI FESTA DO PERCEBE DE VILADESUSO (OIA)

O alcalde de Oia, Alejandro Rodríguez, -ex alumno de Tamuxe- foi o encargado de dar a benvida ao acto e presentar ao pregoeiro

PRESENTACIÓN DO PRIMEIRO NÚMERO DA REVISTA CASTELLUM TYDE

Na imaxe, Xosé Carlos Valle Pérez, Xoán Martínez Tamuxe e Rafael Sánchez Bargiela

PRESENTACIÓN DO SEGUNDO NÚMERO DA REVISTA CASTELLUM TYDE

Na imaxe, algúns dos membros do Instituto de Estudios Tudenses, asistentes ao acto que se celebrou na Área Panorámica de Tui

TAMUXE, NA REUNIÓN PREVIA DA XXIV FESTA DO CABAQUEIRO 2011

Na imaxe, con membros da Directiva da Asociación Os Cabaqueiros, a concelleira de Cutura e os mestres telleiros

XOÁN MARTÍNEZ TAMUXE, PREGOEIRO DA XVI FESTA LUSO-GALAICA DEDICADA A O ROSAL

Na imaxe, Tamuxe coa súa dona, nos exteriores da Casa da Anta (Lanhelas-Portugal)

Xoán Martínez Tamuxe, pregoeiro da XVI Festa Luso-Galaica dedicada a O Rosal

O sábado 20 de setembro celebrouse na Casa da Anta (Lanhelas-Caminha) a XVI Festa Luso-Galaica. Se o pasado ano este evento foi dedicado a Tomiño, a dirección de Casa da Anta, na persoa de Germano Ramalhosa, decidiu que este 2008 o concello convidado fora O Rosal. O pregón da Festa foi pronunciado por Xoán Martínez Tamuxe e versou sobre as relacións galego-portuguesas dende antigo ata os nosos días. Fixo fincapé por exemplo na multitude de apelidos de orixe luso no territorio galaico así como tamén na cantidade de obras artísticas realizadas por mestres canteiros portugueses en todo o Baixo Miño. Este foi o pregón:

Roteiro de Vila Nova de Cerveira

Saíu á luz, dentro da colección "Contributos para a História de Vila Nova de Cerveira" o seu V traballo, Roteiro de Vila Nova de Cerveira. Trátase dunha reedición do Roteiro de José Leal Diogo, actualizada e ampliada polo escritor luso Castro Guerreiro. No libro distínguense varios apartados, entre eles: Primeiro... A História / Do Património e das Instituiçôes / Río... Fonte de Vida / Percorrer o Concelho / Vamos às Freguesias / Informaçao Geral.
Esta publicación consta de 160 páxinas, con fotos en branco e negro. Ten a colaboración especial de Astrolindo M. Antunes - Desenhos e Aguarelas e está editado pola revista "Pórtico Cerveirense".

Presentouse o libro Orgulho Galego na Diáspora. Conversa con Higino Martins Estêvez

O martes 29 de xullo levouse a cabo no Concello de Oia a presentación do libro Orgulho Galego na Diáspora. Conversa com Higino Martins Estêvez, dos autores Ângelo Gonçalves Vicente, Licenciado en Ciencias Políticas e Administración e Bernardo Penabade Rei, Licenciado en Filoloxía Galego-Portuguesa. Abriu o acto a alcaldesa de Tomiño, Sandra González, que é á súa vez Vicepresidenta da Fundación Comarcal O Baixo Miño, entidade que editou esta publicación. Alí nos atopamos co alcalde de O Rosal, Jesús María Fernández Portela, co de A Guarda, José Manuel Domínguez Freitas, o concelleiro de Oia e deputado provincial José Antonio Olmedo, a Presidenta da Fundación Comarcal, Carmen Somoza, así como co noso amigo Néstor Estévez Pérez, director da coral polifónica Vagalume de Oia.
Este libro Orgulho Galego na Diáspora. Conversa com Higino Martins Estêvez, leva o limiar de Edelmiro López Iglesias, Director Xeral de Desenvolvemento Rural, consta de 73 páxinas, con ilustracións a cor e en branco e negro. Esta obra é unha extraordinaria aportación á futura biografía do ilustre oiense, o escritor, investigador e profesor Higino Martins Estêvez, residente en Buenos Aires.

Novo libro de Joaquín Miguel Villa Álvarez

Con motivo do L Aniversario da fundación do Colexio dos PP. Somascos de A Guarda, a organización do dito evento, en colaboración co propio colexio, programou multitude de actividades deportivas e culturais. De todas elas cabe destacar a publicación do libro Colegio PP. Somascos de A Guarda (1957-2007) . 50 años de presencia somasca en España, da autoría de Joaquín Miguel Villa Álvarez, doutor en Historia e profesor dese colexio.
Asistimos como antigo profesor e convidado ao acto da presentación desta obra que se levou a cabo no Salón dos Espellos o pasado día 12 de xullo. Presidiron o acto o alcalde da Guarda, José Manuel Domínguez Freitas, o representante da Comisión do L Aniversario do colexio dos PP. Somascos, Juan Carlos Flores Álvarez, o Pai Vidal, e o propio autor, Joaquín Miguel Villa Álvarez. Esta obra consta de 500 páxinas, ilustradas con fotografías dende a propia creación do centro ata a actualidade. Está dedicada ao P. Orestes Caimotto por ser un dos máis activos directores do colexio.

IV Romaría da Madanela na Pedrada

O domingo 20 de xullo tivo lugar unha nova romaría no monte da Pedrada na honra de Santa María Madanela. A organización correu a cargo das comunidades de montes de Barrantes e Burgueira, coa colaboración dos correspondentes concellos (Tomiño e Oia). Multitude de fies asistiron á Santa Misa oficiada polo Rvdo. D. Jesús García Villadóniga, párroco da Guarda, axudado por D. Antonio Estévez, parroco de Burgueira. Rematada a misa, ademais dos cregos citados interviron o alcalde de Oia, Alejandro Rodríguez e a alcaldesa de Tomiño, Sandra González. Seguidamente a procesión saíu percorrendo o itinerario de costume, dando a volta ao redor da nova e monumental cruz que alí se erixiu. Durante toda a xornada e baixo unhas carpas alí instaladas, os asistentes disfrutaron dos máis típicos e variados pratos galegos. Nesta ocasión e por vez primeira estivo exposto e á venda o libro Memoria histórica da capela da Madanela no monte da Pedrada e vestixios dunha fortaleza.

Jean-Pierre e Marie-Claude Auffret no Rosal

Por terceiro ano consecutivo e dende o 2006, acompañamos polo Rosal a Jean-Pierre Auffret e Marie-Claude Auffret, especialistas franceses na arte rupestre para ensinarlles a ubicación dos diferentes gravados existentes na vila para un estudo que están a realizar sobre este tipo de manifestacións en Galicia. Nesta última visita estiveron presentes tamén o arqueólogo Pablo Novoa e o profesor José Luis Galovart. Un paseo polos montes rosaleses que nos levou por exemplo a observar os cruciformes de Parada, o labirinto de Chan do Rei ou os gravados de Laxe do Lapón.

Castro Guerreiro e a revista Pórtico Cerveirense

Despois de moitos anos, atopámonos no Rosal cun vello amigo, o escritor e historiador portugués, Castro Guerreiro. De aquí en diante acordamos reanudar os contactos de investigación histórica luso-galaica que xa tíñamos iniciado.
Entre as diferentes publicacións que Castro Guerreiro nos deixou ollamos a última revista de Pórtico Cerveirense, do mes de xuño de 2008. Trátase dunha revista de información e cultura para Vila Nova de Cerveira, Vale do Minho e Galicia. Aquí ven unha reportaxe que baixo o título "Fomos ao Rosal á inauguraçâo do Auditório Municipal", o director da revista, Castro Guerreiro, comeza así: "Foi ao cair de uma tarde relativamente amena, numa semana em que o tempo nem ajudou muito já que S. Pedro resolveu presentear esta Primavera com abundantes chuvas, que a vila de O Rosal, se engalanou, para um importantíssimo momento na vida cultural e musical da localidade".

Cruceiros, cruces e almiñas do Rosal


No ano 1999 Xoán Martínez Tamuxe publicou Cruceiros, Cruces e Almiñas do Baixo Miño. I Concello do Rosal. Este libro consta de 288 páxinas e máis de 150 fotografías a cor e en branco e negro. O prólogo é de D. José Luís Portela Trigo e foi editado polo Servicio de Publicacións do Concello do Rosal. A obra é unha catalogación-inventario deste patrimonio relixioso-cultural no municipio rosalés. Trátase do primeiro volume da colección Cruceiros, Cruces e Almiñas de todo o Baixo Miño. O libro vai dedicado "A cantos santeiros fixeron estes monumentos con devoción, esforzo, traballo e inspiración; a cantos devotos os erixiron pola súa promesa; ós veciños que tiveron a honra de telos no lugar; ós cristiáns que algunha vez lles botaron unha doce ollada; a cantos diante deles tiveron un bo pensamento ou lles rezaron unha oración; a cantos rosaleiros emigrantes na distancia se lembraron deles...; a quen, por ignorancia ou mala fe, ó velos blasfemou... ou algunha vez fixo de "tumba cruceiros"; a cantos, aínda que indiferentes, contemplaron e admiraron neles a súa arte... así como a tódolos que aínda hoxe loitan pola defensa ou conservación deste patrimonio".

O seu primeiro libro: La Vía Romana "Per Loca Marítima" por el Bajo Miño y Costa Atlántica

A súa primeira obra data do ano 1975 e levou por título La Vía Romana "Per Loca Marítima" por el Bajo Miño y Costa Atlántica, asinando como J. M. del Tamuje. O libro reza a seguinte dedicatoria: "A cuantos en el Bajo Miño y en cualquier tiempo, con la pluma o el pincel, procuraron honrar a sus mayores, exaltaron las virtudes de sus gentes, contaron las bellezas de sus tierras y reconocieron la bondad del Creador al regalar tantos dones a la Comarca Miñota".


La Vía Romana "Per Loca Marítima"... comeza así: "Uno de los temas de historia regional que más se han debatido y que todavía se mantiene obscuro, es, sin la menor duda, la ubicación de la IIª Vía Militar o la "Per loca maritima". Y pensamos que de los tramos de dicha ruta el más difícil de identificar tal vez sea el que debió unir la Iª Mansión: "Castellum Tude" -Tuy- con la IIª: "Vicus Spacorum" -Vigo-".

Memoria histórica da capela da Madanela no monte da Pedrada e vestixios dunha fortaleza

De esquerda á dereita, Jaime Fernández Vicente, Presidente da CC.MM. de Barrantes, Manuel Vila Carrera, Secretario da Comunidade e os autores, Tamuxe e Juan Ramón durante a presentación do libro


Viu a luz a finais do mes de novembro un novo libro da autoría dos rosaleiros Xoán Martínez Tamuxe e Juan Ramón Martínez Barbosa.

Títúlase Memoria histórica da Capela da Madanela no Monte da Pedrada e vestixios dunha fortaleza. Leva prólogo do arquitecto e historiador vigués, Xaime Garrido. Ten 96 páxinas e atópase en boa parte ilustrada a toda cor, con máis de cen fotografías.

Editaron e patrocinaron o libro as Comunidades de Montes de Burgueira (Oia) e de Barrantes (Tomiño).

Lembrando a Xosé Carlos Gómez Alfaro

Este mércores 28, fai dúas semanas que falecía de forma inesperada na Guarda o profesor e poeta Xosé Carlos Gómez Alfaro. Fíxoo cando participaba como xurado no Concurso de Redación e Debuxo que como cada ano organiza a Agrupación Cultural Guardesa. Dende 1978 ata o seu pasamento viña exercendo como profesor no Colexio dos PP Somascos de A Guarda. Aínda que naceu en As Chabolas (Ribadavia), como el dicía A Guarda era a súa segunda matria.
Causou fonda impresión no ámbito socio-cultural na bisbarra do Baixo Miño e por suposto tamén na súa terra natal.
Notable e inspirado poeta, deixou para a posteridade unha decena de libros, acadando importantes premios a nivel galego.
O venres 16 procedeuse en Sadurnín-Cenlle (Ourense) á celebración do funeral polo eterno descanso da súa alma. O Colexio dos PP Somascos de A Guarda fletou dous autobuses ata alí e multitude de coches particulares tamén quixeron darlle o último adeus ao amigo Xosé Carlos.
O acto fúnebre levouse a cabo na artística igrexa parroquial de San Xoán de Sadurnín, de fermoso estilo románico. Cocelebraron a Santa Misa o Pai Airas, o Pai Varela e o Pai Vidal (Somascos), así como o párroco e varios sacerdotes da localidade. A igrexa resultou pequena para dar acollida aos numerosos fieis e amigos que quixeron despedir a Xosé Carlos. A homilía foi pronunciada polo Pai Airas, quen resaltou as diferentes dotes humanas, docentes e intelectuais do profesor Alfaro. Cabe destacar tamén a sentida intervención dun escritor e poeta amigo do finado Xosé Carlos, quen recitou unha poesía rematada a ceremonia.
Entre os asistentes ao sepelio relacionados co mundo das letras e da cultura, lembramos entre outros, a Julia Sobrino, Presidenta da Agrupación Cultural Guardesa, a Joaquín Miguel Villa Álvarez, historiador e profesor tamén dos Somascos, a Ricardo Rodríguez Vicente, corresponsal de prensa na Guarda, a Tino Baz, cantautor dalgunha das letras de Alfaro e a diferentes mestres, amigos, compañeiros e alumnos seus.
Dende aquí reiteramos o noso máis sentido pésame á súa viúva Rosa Berta, ao seu fillo Daniel, así como aos seus pais Xosé e Alicia e demais familia.

PRESENTACIÓN DO PRIMEIRO NÚMERO DA REVISTA CASTELLUM TYDE DO INSTITUTO DE ESTUDIOS TUDENSES

Xosé Carlos Valle, Xoán Martínez Tamuxe e Rafael Sánchez Bargiela durante a presentación de "Castellum Tyde"


O luns 24 de marzo de 2008 tivo lugar no Museo Municipal de Tui a presentación do primeiro número da revista “Castellum Tyde” do Instituto de Estudios Tudenses.
O secretario desta asociación, Rafael Sánchez Bargiela deu a benvida ao numeroso público asistente, facendo unha breve reseña biográfica do convidado para tal evento, o director do Museo de Pontevedra, Xosé Carlos Valle Pérez, que procedeu á presentación da revista.
Na súa intervención salientou Valle Pérez a loable “revitalización do Instituto” que fora fundado no ano 1991 e que agora, despois de máis de 15 anos rexurde das súas cinzas coa publicación dunha revista que ten que ser “un referente xa non só na provincia, senón internacionalmente, debido á historia e á situación estratéxica de Tui”, realizando unha breve reseña das colaboracións literarias de cada un dos asinantes. Pechou as intervencións o presidente do Instituto de Estudios Tudenses, Xoán Martínez Tamuxe, facendo un percorrido cronolóxico, dende os 9 cofundadores desta asociación histórico-cultural ata o novo ingreso o ano pasado de 7 membros máis de recoñecido prestixio no mundo das letras e da investigación. Rematou dando ás grazas a cantos se achegaron ata o antigo Convento de San Domingo –sede do Instituto- desexando que aínda que a periodicidade da revista vai a ser anual, se poida facer un número extra dedicado á figura do ilustre tudense Xosé María Álvarez Blázquez, a quen se lle adica este ano o Día das Letras Galegas.



Estes son os temas incluídos nunha revista que consta de 272 páxinas, ilustradas con fotografías en blanco e negro e que foi editada con fondos propios do Instituto.

-Presentación.
-Aquilino González Santiso. (Xoán Martínez Tamuxe).
-Castellum Tyde ou a existencia dun xacemento castrexo no conxunto histórico da cidade de Tui. Elementos de valoración. (Juan José Perles Fontao).
-Los juegos medievales sobre tablero en piedra de la catedral de Tui (Pontevedra). Por José Manuel Hidalgo Cuñarro.
-Aportación ao estudo da identificación, antigüidade e cristianización das primeiras parroquias da sede episcopal de Tui citadas no II Concilio de Braga no 572. (Xoán Martínez Tamuxe).
-Los antiguos palacios episcopales tudenses. (Ernesto Iglesias Almeida).
-La capilla de Santa Catalina y el palacio episcopal de Diego de Muros en la Catedral de Tui. (Marta Cendón Fernández).
-Domingo Rodríguez de Pazos. Autor del retablo mayor de la colegiata de Cangas. (Jesús Casás Otero).
-Parlamentarios tudenses. Da Guerra da Independencia ao Directorio (1808-1923), por Rafael Sánchez Bargiela.
-Tuy y la Guerra de la Independencia. Información de los acuerdos del cabildo de la Catedral. (Avelino Bouzón Gallego).
-El teatro principal de Tui, lucha del pueblo por su recuperaicón. (Jaime Garrido Rodríguez).
-Estatutos do Instituto de Estudios Tudenses.
-Normas para a presentación de orixinais para "Castellum Tyde". Revista do Instituto de Estudios Tudenses.